379.- Ainsi avint que Damiete fu conquise, dont crestien furent baut et joiant. Et vint li cuens d’Artois au roi, et li dist : « Sire, que sejournons sous ci ? Se vous voulez croire, nous chevaucheriens entre nous et le Temple et l’Ospital. Et sachiez, la terre est nostre ; ne jà ne trouverons qui la nous contredie.- Certes, biaus freres, dist li rois, se vous m’en creez nous nous soufferriens encore ; si apenriens la terre et le païs, qui mout est forz à conquerre ; et li Turc sont sage et bon guerrieur.

380.- « Sire, dit li cuens d’Artois, il nous couvient passeir le flun Jourdain : et se nous aviens passei le flun Jourdain, nous averiens conseil comment nous esploiteriens.- En non de moi, biaus freres, je resoing tant vostre hardement et tant connois vostre courage que se vous aviez le flun passei, vous n’i atenderiez ne chaut ne chevelu.- Ha ! sire, dit li cuens, je vous jur que je vous atenderai tant que vous serez passeiez. » Li roi en prist le serement, et li otroia le congié de passeir le flun ; mais se il seust qu’il en avint, il ne li eust otroié pour tout l’or dou monde.

381.- En icelle nuit avint proprement que li cuens d’Artois fist sa gent armeir, et Templiers et Ospitaliers ; et passerent le flun. Et furent passei au jour par un crestien renoié, qui savoit les passages, et savoit le païs et la terre ; et dist au conte d’Artois : « Sire, se vous me vouliez croire, je vous feroie annuit gaaingnier le plus grant tresor dou monde, qui est en une vile qui à non la Mansorra, où toutes les genz de cest païs sont fui.

382.- « Alons i, dit li cuens.- Ha !sire, dit li maistres dou Temple, que c’est que vous dites ? Pour Dieu merci, vous ne savez que ce monte. Où vous cuiderez que Sarrezin soient desconfits, jà ne garderez l’eure, si en serez touz avironneiz. Mais pour Dieu, sire, atendons le roi qui doit enqui passeir ; et vous, sire, li avez en couvent que vous ne vous mouverez devant qu’il soit passeiz.

383.- « Hai, hai ! dit li cuens, voirement ce dit on voir : Adès aura il en Templiers dou poil dou leu.- Voire, dit li maistres, qui mout estoit hardiz et preuz, or chevauchiez pueil part que vous voulez, et nous vous sivrons ; ne jà, se Dieu plait, ne porrez reprouveir à Templier nulle mauvestié, par teil couvent que onques la crestienteiz ne reçut si grant domage comme elle recevra encui en cest jour, si comme mes cuers le me devine. »

384.- Atant fierent chevaus des esperons et s’en vont à la Mansorra ; et entrent enz, et leur sembloit que il n’i eust nului. Mais certes si avoit : toutes les terraces estoient pleines de Sarrazins bien garniz de grosses pierres et de peis aguz, et les entrées de la ville estoient lacies de barres couleices. Et maintenant que il furent enz entrei, les barres furent coulées et fermées ; et commencierent cil des terraces à geteir grosses pierres et peis aguz, et reverseir iaue bouillant pour eus eschaudeir. Et li tans estoit chauz et crestien estoient en presse ; si estoient en si grant destroit que il n’avoient pouoir d’eus secourre ne aidier.

385.- Et quant Sarrezin les virent à si grant meschief, si s’esforcierent plus et plus, et tant que il les mirent à la mort presque touz. Et li rois, qui de tout ce ne savoit mot, passoit le flun ; et quant il fu passeiz si cuida son frere trouveir, si nou trouva point ; et lors dist li rois : « Ha ! freres, comme je croi que vostre orgués nous grevera et fera d’ennui ! »

386.- Atant ez vous un de ceus qui en estoit eschapeiz ; et vient au roi, et li escrie : « Ha ! sire, malement est ; morz est li cuens d’Artois vostre freres, et toute la chevalerie qui avec lui estoit, et li maistres dou Temple, et cil de l’Ospital. Et sachiez, sire, je vous di voir ; que je le vi ocirre à mes ieus. » Quant li rois l’oï ainsi parleir, si pensa un pou, et soupira mout grief, et dist : « Se il est morz, Dieus li face pardon de ses pechiez, et lui et touz les autres ! » Atant commanda li rois que les tentes et li pavillon fussent tendu ; si ce reposeroient, car li oz estoit mout travailliez dou flun qui estoit parfonz et roides.